Գիա Կանչելի – «Պարզ երաժշտություն դաշնամուրի համար» (կինոյի և թատրոնի երաժշտության թեմաներով)

Աննա Ցագարելի (դաշնամուր)

«Պարզ երաժշտություն դաշնամուրի համար» ալբոմ է, որ Գիա Կանչելին կազմել է կինոյի և թատրոնի համար գրված երաժշտության առավել արտահայտիչ և վառ դրվագներից։ Այն թողարկվել է 2009-ին։

Համերգի ծրագրում ներառված է ոչ միայն «Պարզ երաժշտություն դաշնամուրի համար» ալբոմը, այլ նաև պատմություններ կոմպոզիտորի, նրա արվեստի և մարդկանց մասին, ովքեր կարևոր դեր են խաղացել Կանչելիի հանճարի կայացման ճանապարհին։

Աննա Ցագարելին երիտասարդ տաղանդաշատ դաշնակահարուհի է, ավարտել է Մոսկվայի կոնսերվատորիան և ասպիրանտուրան, մի շարք միջազգային մրցույթների դափնեկիր է, դասական երաժշտության մասին «Երաժշտական պատվաստում» նախագծի հեղինակ։ Ստեղծել է դաշնամուրի ուսուցման սեփական մեթոդիկան:

«Պարզ երաժշտություն դաշնամուրի համար»՝ սա ոչ թե ուղղակի դասական երաժշտության համերգ է, այլ հեղինակային ծրագիր, որն ընկղմում է կոմպոզիտորի ստեղծագործական աշխարհ՝ երաժշտությամբ, խոսքով և ալբոմի նկարազարդումներով։

Գիա Կանչելին (1935-2019) 20-րդ դարի վերջի և 21-րդ դարի սկզբի ամենանշանակալի կոմպոզիտորներից է։ ԽՍՀՄ ժողովրդական արտիստ, ԽՍՀՄ Պետական մրցանակի, Չայկա, Տրիումֆ, Նիկա և շատ այլ մրցանակների դափնեկիր, Վրաստանի Պատվո շքանշանի դափնեկիր: 

Բազմաթիվ սիմֆոնիկ, կամերային և վոկալ ստեղծագործությունների հեղինակ է, միջազգային ճանաչում է ստացել ինչպես մասնագիտական շրջանակներում, այնպես էլ լայն հանրության շրջանում: Գիա Կանչելիի երաժշտությունը կատարում են լավագույն նվագախմբերն ու մենակատարները աշխարհի ամենահեղինակավոր հարթակներում: 

Ակադեմիական ժանրերին զուգահեռ՝ Գիա Կանչելին երաժշտություն էր ստեղծում կինոյի և դրամատիկական ներկայացումների համար։ Ընդհանուր առմամբ, նրա ստեղծած երաժշտությունը հնչում է մոտ 70 ֆիլմերում և 40 ներկայացումներում։ Դրանցից ամենահայտնիներն են Գեորգի Դանելիայի «Միմինո», «Կին-ձա-ձա», «Արցունքները կաթում էին» և «Մի վշտացիր» ֆիլմերը։

Կանչելին նաև երաժշտություն է գրել աշխարհահռչակ վրացի ռեժիսոր Ռոբերտ Ստուրուայի բազմաթիվ ներկայացումների համար։

  Տոմսի արժեքը՝ 4000 դրամ