ՄԵՆԱԿ ԵՐԿՈՒՍՈՎ/ ԼՈԼԱ/ՀԵՐՈՍՏՐԱՏ/ՎԱՐՁՈՒ ՍԳԱՎՈՐՆԵՐ/ՌԵԼԻՔՎԻԱ

2025, Հայաստան, 11 րոպե

«Մենակ երկուսով» ֆիլմը պատմում է Շուրայի և Օֆելյայի մասին՝ տարեց ամուսնական զույգի, որը գրեթե հիսուն տարի միասին ապրել է արտաքին աշխարհից մեկուսացած փոքրիկ տանը։ Ֆիլմը սկսվում է Օֆելյայի մահից հետո և աստիճանաբար հետ է շարժվում ժամանակի մեջ, որտեղ հիշողությունը, լռությունն ու տարածությունը միաձուլվում են մեկ հուզական իրականության։ Ժամանակը զարգանում է շրջանաձև և երբեմն՝ քարացած։ Տունն ինքն է դառնում հիշողության կենդանի արխիվ՝ իր լուռ առարկաների, մաշված պատերի և դատարկ սենյակների միջոցով պահպանելով բացակայության ու գոյության հետքերը։ Անշարժ պատկերների և անցյալի կադրերը Շուրայի ներկա կյանքի հետ համադրելու միջոցով ֆիլմը բացահայտում է միայնությունը, հիշողությունը և միասին ապրած կյանքի անտեսանելի շարունակությունը։

2025, Ռուսաստան/Հայաստան, 12 րոպե

Քրոջ կորստից հետո երիտասարդ պարուհուն անընդհատ հետապնդում են մի երգ և վիշտը, որն այլևս չի կարող զսպել։ Աստիճանաբար նա ստիպված է առերեսվել կորստի ցավին և գտնել ապրելու ուժը հիշողությունների ու երաժշտության միջով։

2026, Հայաստան, 20 րոպե

Համլետը սովորական գրասենյակային աշխատող է, որը փորձում է հաղթահարել սիրելիի կորուստը։ Արտաքուստ թվում է, թե նա հաշտվել է դրա հետ՝ մեխանիկորեն ապրելով իր առօրյան և կատարելով այն, ինչ պահանջվում է իրենից։ Սակայն այդ անտարբերության տակ աշխարհի հանդեպ զայրույթն ու վիրավորանքը աստիճանաբար կուտակվում են՝ ի վերջո մղելով նրան մի շարք անդառնալի կործանարար արարքների։ Ժան-Պոլ Սարտրի գաղափարներով ոգեշնչված ֆիլմը ուսումնասիրում է կորստի, օտարման և ներքին փլուզման թեմաները։

2026, Հայաստան, 35 րոպե

«Վարձու սգավորներ» ֆիլմը պատմում է վարձու սգավորների ընտանիքի մասին, որտեղ այդ յուրահատուկ մասնագիտությունը սերնդեսերունդ փոխանցվում է ընտանիքի կանանց։ Սակայն 16-ամյա Մարգոն բոլորովին այլ ծրագրեր ունի։ TikTok-ում արագ ճանաչում ձեռք բերող աղջիկը չի ցանկանում շարունակել այդ ոչ այնքան գրավիչ ավանդույթը։ Ամեն ինչ փոխվում է, երբ տատը՝ Բավոն, հայտարարում է, որ իրեն ապրելու ընդամենը մեկ շաբաթ է մնացել։ Մոր բացակայության պայմաններում ընտանեկան ժառանգությունը շարունակելու պատասխանատվությունն ամբողջությամբ ընկնում է Մարգոյի վրա։ Վճռելով փոխանցել իր գործը՝ Բավոն ունի ընդամենը յոթ օր, որպեսզի պատրաստի թոռնուհուն այն դերին, որի համար, իր համոզմամբ, նա ծնվել է։

2025, Հայաստան, 23 րոպե

10-ամյա կույր տղան՝ Մինասը, օժտված է մարդկանց բուժելու կախարդական շնորհով, սակայն ստիպված է ապրել հոր կողմից չընդունված լինելու ցավով։ Նրա միակ ապավենը տատն է, որը փորձում է վերադարձնել թոռան տեսողությունը և սիրով առաջնորդել նրան։ Տատի մահից հետո գյուղի քահանան խնամում է Մինասին, բայց գյուղացիները, վախենալով նրանից և մեղադրելով անցյալի ողբերգությունների համար, թշնամանում են նրա դեմ։ Երբ Մինասը գաղտնի բուժում է հիվանդ աղջկան, իսկ հաջորդ օրը քահանան մահանում է, գյուղի բարոյական անկումը առավել ակնհայտ է դառնում։ Ի վերջո, Մինասը հեռանում է գյուղից՝ իր հետևում թողնելով միայն մառախուղ։

Կազմակերպիչ ՝ «Ոսկե Ծիրան» Հ.Կ.